-->
مجلة العربي الأدبية مجلة العربي الأدبية
recent

آخر الأخبار

recent
recent
جاري التحميل ...
recent

د. عادل صابر .. مواويل رباعية في فن الواو - مجلة العربي الأدبية




" مواويل رباعية في فن الواو "



كتب د. عادل صابر :


  شهيد بينزف- بيكتب اسمه من نزفُه

موشوم فى صدر الوطن لايمكنك حذفُه

ماهو لولا فَري الخرَز إزّاى يكون ملضوم

والناى لولا الخروم حيجيب منين عزفُه ؟!

****

قدّمت كفّى سنابل للفقير يوم جاع

وفتحت قلبى منادر للغريب يوم ضاع

مرهون يايوسف أنا ف وطنى بدون عِلّة

لاسرقت غَلّة ولالقيوا ف متاعى الصاع

*******

ليل المتاهة الغبى بيحاصر الفوانيس

وغيطان بلدنا بترفض سلطة الدرابيس

وبرغم صبر الدروب على كل لص جبان

بكرة تثور البيبان ، وتكسِّر الترابيس

*******

فرح الإبر يبتدى بعد احتضـان الخـيط

ولامعنى للطوب إلا فى انتصـاب الحيط

قيمة العَباية بتاجى من عـذاب الصوف

ومن دموع الشادوف تاجى ابتسامة الغيط

******

الشر والخير سوا خالدين ليوم الدين

زى الضلام والقمر ، زى الغدير والطين

دايماً حتبقى الديابة تحاصر الأغنام

وحيبقى كُنّ الحمام بيصارع التعابين

******

فُك الرِقاب " يانبى " ، ليل المظالم طال

رجِع الزمان الغبى ، بعذاب يهِد جبال

لسّة الصنم منتصب ، والخلق مطاطية

ولسّة كرباج أُميّة يشُق ضهر بلال

******

ليكم حمام البلد ، ليكم غيطان ونخيل

وانتو العَلَم والقَلم ، والعشق والمواويل

فاانسوا كلام الهوى ، وانسوا عيون المها

واحموها من أبرهة لو جه بمليون فيل

*******

ماتبيعش الصبح لو حتى بمليون ليل

ولاتهجر الحلم لو خضَّر فى جبل الويل

خذَلك حصانك،فكون على خطوتك حارس

مش كل فارس بيكسب جولته بالخيل

******

مخنوق مالاقى هوا ، ولاّ الهوا مخنوق ؟ !

وشانقنى حبل الأمل ، ولاّ الأمل مشنوق؟!

ودا جرح بان فى السما ولاّ هلال العيد ؟!

واحنا فى سوق العبيد ولاّ عبيد فى السوق ؟!

******

مصلوب على النخل،هابشانى نياب الريح

دمّى غُنا القمح ، ودموعى بُكا المساطيح

مقسوم نُصّين ، ببلطة خاينة وعجوزة

نصّى يهوذا اللى سلَّمنى ، ونُصِّى مسيح

******

من نفس نوع التقاوى تجنى محصولك

وبقدر نوع البلاوى تنجِلِى أصولك

زاحم خصومك وزُق الناس عن حقّك

دا بقدْر زَقّك ياصاحبى ينتهى وصولك

******

فصّلت كِسوة لبدَنى من فِــراش أيوب

وصنعت قَطرة لعينى من دموع يعقوب

شيخ الطريقة كشفلى السر فى أسايا

قاللى العِناية بَلايا والعطايا كروب

*****


لامعاى عصاية الكَليم ولا جُـبّة الحلاّج

ولاليّا سُلطِة يسوع ع البحر لو يوم هاج

أنا بس هُدهُد سبأ جانى بأمر خطــير

عن خَلْـْق عَبدوا القدير وقتَلهم الحجّاج

******

صبرك ياشعب اتلهَـى فاق ماالتقاش بلـده

يشبه لراجل ضرير ضاع ع الطريق سَـنَده

وبرغم هجْـر البلح ، النخل عاش فى رضا

لولا الإيمان بالقضا ، كان هَـج ورا ولـدُه

*******

وان جَفْ نهر الأمل ،رزق الشبَك مايضيع

وان عشّموك بالقمر ، شمعة هواك ماتبيع

وان راودك حلم ماتقولش دا فين ومِتَى؟

لَوِّن حيطان الشتا ، وانقُش عليها ربيع

*****

السِلْم كلمـة نبى ، تجعل دمـارها عَمـار

والحرب كلمـة غبى ، تجعل عمارها دمار

والزيف حَـيْبان ، حتى ان كان مـتدّارى

ولابُـد كُـتْر الليالى تفضـح الزَمّـــار

*******

مهما تزَعبِّل على عيون الوطـن زعـابيل

لسّة فْ غيطان الـدُرة بتزغرِت القـناديل

وان زادت الريح ماتقلَع غير هزيل الشَـتْل

واحنا شجر أتْـل راضع من عكار النيل

د. عادل صابر 

   مجلة العربي الأدبية 

د. عادل صابر .. مواويل رباعية في فن الواو



التعليقات



جميع الحقوق محفوظة

مجلة العربي الأدبية

2022