نص " صباح قلقان وتضايق "
كتبت أ. منى عبد الرحمن :
صَباح قَلْقان ومِتضَّايِق
بِيِشْرَب شَاي لَكِنُّه بَرضُه مُش رايِق
يِقُول أشْعار
مِدادهَا نَار
تِوَلَّع فِ الوَرَق كُلُّه
ويِتْمَشَّىٰ علىٰ شُوك الفُراق والبُعد
ويِحرِم نَفسُه مِن حِلوِ الهَوَا ومُرُّه
صَباح نِفْسُه يكُون هَادي
يِعيش الفَجر مِن أوِّل أدان الشُّوق
لِحَد شُعاع أمَل نَادي
يِطمِّن قَلبُه علىٰ قَلبُه
يِجيبلُه مِ السَّما حِتَّه تِكُون جَنبُه
ولسَّه الصُّبح مُش راسي علىٰ حَالُه
يِبُص يمِين وشَرق وغَرب وشمَالُه
عَشان رُوحُه ماتِطمِّن يِغنِّي ويحكِي مَوَّالُه
وآخْرِتْها مَفيش فَايدَة
غِير انُّه يكُون صَباح مِن غِير مايِطمِّن
أقُولُكوا إيه....
صَباحكُم خِير
ا. منى عبد الرحمن
جمهورية مصر العربية
مجلة العربي الأدبية
