"دُولاب_العمر"
كتبت أ. منى عبد الرحمن :
دُولاب العُمر بِيْقَفِّل ضُلَف رُوحُه
بِيجْري مِنِّي يِتْخَبَّىٰ ف لِسانْ بُوحُه
وخَطوَة بخَطوَة يِسبَقْنِي
ويِجْري أوَام ومَلْحَقْهُوش..ويِلْحَقْني
يِشِد ف كُم أيَّامي
ويِمْسِك في خِناق الرُّوح
ويعمِل رُوحُه خَدَّامي
ويِضْحَك والضَّمير بِيْنُوح
ومَالي كفُوفُه مِن حِلْمي
ويِرمِيه في كابُوس مَفْتُوح
يِمَنِّيني بعُمْر بَراح
سَاعاتُه هَاتِنْشِبِك فِيَّا
تِنَوَّر كُل لَيَالِيَّا
وانا شَايفَة عُيون الزِّيف
محَاوْطَه كلامُه وحروفُه
أنا بَاشُوفُه
بِيِكْسَر فِيَّا وبَصَدَّق
بأن كَلامُه كان أصدَق
وإنُّه حَقيقي بيْحَقَّق
أماني وحكايات حَوادِيت
ياااااريت.....ياريت
ياريتُه حَقيقي كان صادِق
ويِحلِفْلي علىٰ السَّاعات
بإن الفَرح بُكرَة يبَات
فِ دِيل تُوبي..ومَكتُوبي
لكِن طَبعُه يادُوب الغَدر
وانا صَابْرَة
وقَلب الصَّبْر جُوَّايا
وادِيها حَياة
وعُمر بَاعِيشُه وَيَّايَا
وباستَنَّىٰ
دُولاب العُمر لمَّا رفُوفُه تِفْضَىٰ عَلِيه
#ديوان_إنسان_من_نور
أ. منى عبد الرحمن
جمهورية مصر العربية
مجلة العربي الأدبية
