صدرها أترهل
كتب أ. ناصر دويدار :
صدرها أترهل
كان زى ضوء طالع من شباكين مفتوحين ع البحر
بفتكر أول رضاعه
لساني المبلول من نهر جارى
دفا حجرها
فخدين الفرس
بلح أمهات النخل
كانت... وطن
أصبحت نداله بحجم الكون
دبلت عيونها
نزحت مراره الانتظار
من أول محطه
لآخر متر حتنام فيه... في التراب
صدرها أترهل
سنه جديده بتخش علي قلبها
تجمد الايام
تشنق العصافير علي سلك الكهربا
تكسر البراويز علي الحيطه
تبحطر الذكريات بيننا
هنا لعبنا
هنا بوستها علي السلم
وتحت يافطه الشجره أتخانقنا
وهناك أتصالحنا في أخر ركن في البرواز
عيونها وسع المدى
والحزن
كل الأماكن مطبوعه علي جلدى
ميدان التحرير
المترو
جروبي
مطار القاهره
بطانيه السرير الجديده
الترنج القطن
ريحه السمك
طعم الشاى
آخر سيجاره
صدرها اترهل
وأنا رجعت م الاول
انادى علي مصر
يااااا
ياااااااا
يااااااااااا
مصر
انا
محصراني الكمنجات
وأنا متهم ف وسطها
إني حبيت الغنا
وبغني فرح...
لناس ميتين
كتب أ. ناصر دويدار
جمهورية مصر العربية
مجلة العربي الأدبية
