"وقلبگ هبقا أنا مولاه "
كتب أ. عيد أبو حجاج :
انا و انتي لما الليل يُبدر نجوم ف الفضا...
و القعده ع الكورنيش و الضحك و الفضفضه...
يُقف القمر مكسوف ننده يلبي الندا...
و ف إيدُه عود درويش و بداره بتغني...
تنده يا طير مايجيش فتقربي مني...
تلمع عنيكي و اتوه جواها لـ ابعد مدى...
فتزُقي باب قلبي تلاقيكي متمدده...
تفتكري يطلع أيه أجمل يا يااااه من كده؟؟...
............
سلام الله على قلبِك...
و من قلبي يا قلبي صلاه...
دعيت فيها ان اكون جنبك ...
و انول كل اللي بتمناه...
و اعود قلبي على شوفك عشان يفرح...
و احط النبض ف كفوفك حنان يطرح...
حنين يكبر يمد الضل ف المطرح...
تطل الشمس من عينك تصحي الطير عشان يسرح...
يلقَّت رزقنا أحلام...
يدندن حبنا أنغام...
و يغزل من غرامنا حياه ...
و يقطف احلى أزهاري...
و يفرش حجرك الواسع بأشعاري...
تمدي ايديكي تختاري...
فتطلعلك بحبك ياااه...
وحُبِك يعني روح و حياه...
يمين بالله..
بحبِك و الدليل عرفاه...
ف بُعدك دنيتي شارده...
بحبِك (يااااه)...
يا كون طارح يا دوب ورده...
آيات الله...
ف تكوينك يا ياه وارده...
بحبِك ياه..
و زي ما احب كوني هكون..
مُنى عيني...
تضميني و اضمِك ضَمة تحييني...
أضمِك ضَمة المشتاق...
تجاوبيني...
بشئ معناه...بحبَك يااااه...
و حُبَك زي روح و حياه...
فتوحيلي بفكره جنان...
هصبك جوا قلبي حنان...
و قلبك هبقا انا مولاه...
بحبك ياه...
سلام الله على قلبك و من قلبي يا قلبي صلاه...
أ. عيد ابو حجاج
جمهورية مصر العربية
مجلة العربي الأدبية
